The Ng'koh Nulis

             Pura besakih magenah ring bongkol Gunung Agunge. Desa Besakih, Kecamatan Rendang, Kabupaten Karangasem. Pura Besakih pinaka pura pinih ageng ring Bali saha madue palebahan kirang langkung tiga likur. Yening rereh saking kota Denpasar dohnyane nem dasa kilometer, pamargine nglintang kota Gianyar miwah Klungkung. Saking kota Klungkung ngalerang malih kalihlikur kilometer.

             Pura Besakih punika pinaka puser purane ring Bali, makagenah nyiwi Ida Sang Hyang Widhi. Pamucuk genahe tan seos wantah Pura Panataran Agung. Genah natar purane mapanta-panta wenten pitung panta makalambang sapta patala. Pujawali ring Pura Panataran Agung kamargiang nyabran rahinan Purnama Kapat. Ring Panataran Agung wenten Padma Tiga pinaka linggih
Ida Sang Hyang Tri Purusa utawai Sang Hyang Siwa Tiga minakadi Batara Siwa, Sadasiwa, miwah Parama Siwa. Sajaba punika, nyabran rahinan Purnama Kadasa kawentenang pujawali sane kawastanin pujawali Batara Turun Kabeh. Ri tatkala punika makasami umat Hindune patutu pedek tangkil ngaturang pangubakti. Sajaba punika, satunggil dasa warsa taler kawentenang pangaci sane kabaos Tawur Panca Walikrama. Yening sampun satus warsa kawentenang malih Tawur Eka Dasa Rudra. Tawur Eka Dasa Rudra sane pinih untat sampun kamargiang duk Tileming Cetra Isaka warsa 1900, tanggal masehi 28 Maret 1979.

            Sadurung ngranjing ka Panataran Agung Besakih, ring jabaan wenten wangunan anyar sane mawasta Mandapa Kesari Warmadewa, genah pasamuan agama minakadi pasamuan agung miwah mahasabha Hindu Dharma. Ring asapunapine taler kanggen genah mararian sarwi nabdabang raga jagi pedek tangkil ka pura.

Wewangunan pura Besakih sane ageng tur unik prasida pinaka sinalih tunggil objek wisata budaya ring Bali sane akeh katuju antuk para wisatane. Sajaba punika genah Pura Besakih punika wiakti kalintang ngangobin sang ngatonang. Ri kala terang baskarane nenten kaliput antuk sayong, katon Gunung Agunge, gunung sane pinih luhur ring Bali, kakayonan madianing gunung katon gadang lom ngulangunin pesan. Yening macecingak saking ngawewehin kaasriannyane, sane prasida nudut kayung para turise rauh ka Besakih. Katah malih yening baosang indik kautamannyane tan samen ring jagate.

           Makasami umat Hindune nenten purun lempas, mautsaha pedek tangkil ri nuju pujawali utawi pangusaban ring Pura Besakih. Asapunika taler para karyawan perusahan, kantoran, utaminipun para yowanane, para siswa, mahasiswa sami pedek tangkil nyinahang pangubakti duaning sajeroning ngulatiang pangweruhan patut kadulurin antuk astiti bhakti ring Ida Sang Hyang Widhi Wasa, taler ring para leluhure makasami. Elingang pisan, sampunang lali pedek tangkil ri kala wenten piodalan miwah pangaci ring Pura Besakih.